Am Samstig hend mer ös am 12.30 im MZG versammlet. Nochere Warteziit vo ca. 30 min sind mer den ohni di Unentschuldigte drüü Blaaris (wie chönts au andersch sii) richtig Brülisau ufbroche.
Kum sind mer z Brülisau gsi, hend sich sofort drüü Blaaris freiwillig gmolde, zum s’neu Bähnli uszprobiere. Die andere 6 Blaaris sind den voller Energie richtig Blattäbödeli abmaschiert.
Nochemene strenge Ufstiig sind mer vollgschwiizt und mit schwere Bää im Blattenbödeli acho. Mer sind so schnell ueglofe, dass mer dobe no hend chönne uf üsi fuulä Blaaris warte. Nochere guete Stond sind mer den alli ufbroche richtig Bollewees. Zwüschetinne hets den nochli gseicht aber mit Regeschirm und Kabuzä hämer den au das überstande.
Wo mer alli hungrig i de Bollenwees acho sind hemmer mit leerä Mäge no bis am 6ii müsse uf de Z’Nacht warte. Nochdem mer üs dä Ranzä voll gschlage händ sind mer zum gmüetliche Teil vom Obet cho. G Jasset wie di holä, Gsoffe öb mer am vertorschtä sind und drofabe s bekannte 1Fränklärä……
Nochdem das de Wirt am halbi 12fi bereits di letscht Rundi akünt het, hets nomol e „chliiiniii“ Bstellig geh. Wo au diä im Minutetakt gsoffe worde isch, hemmer vom Wirt no e feins Bettmümpfeli übercho. Nochemen churze und astrengende Tag sind alli müede Blaaris is Nescht….
Wärendem unruhige ischlofe, vorallem für anderi Gäscht, sind au mer endlich Ruhig gsi. Am halbi 6ii am Morge hämmer dank em Aff sim Aff ä Nacht und Nebel Aktion gstartet. Nochmene tüüfe Hueschte samt Material und emene Nasse Traum sind mer vomene bissige Gstank gweckt wordä. Nochere Stund und mit faire verteilig vo de Ämtli hend mir den endlich wider is Nescht chönne…
Es isch nöd lang gange und mer hend wider us de Federe mösse. De Z’Morge isch parat gsi. Mit viil Chääs und ohni Fleisch hend mer den de Abstieg agreffe. Nochemene churze Marsch simmer au scho wider bi de ös bekannte Wertschaft am Blattebödeli acho. Mitere Verstärchig im Mage hend mer au di letscht Etappe mit Muskelkater gmeischteret.
Es isch wie jedes Johr choge loschtig und gmüetlich gsee.
Bipo
Noch kein Kommentar, Füge deine Stimme unten hinzu!